Намрын дунд сарын шинийн арван долооны билэгт сайн өдрийг тохиолдуулан залуу хосуудын гэрлэх ёслол, хүндэтгэлийн арга хэмжээг 2023 оны 10 дугаар сарын 01-ний өдөр зохион байгууллаа.
Гэр бүлийн үнэ цэнийг нэмэгдүүлэх, гэр бүлийн тогтвортой байдлыг дэмжих, залуу хосуудад амьдралын мартагдашгүй нандин дурсамжийг бий болгох зорилгоор зохион байгуулсан энэхүү арга хэмжээнд хуримлагч Ганболдын Энхням Ганзоригийн Мөнгөнтуяа, Мөнхбаатарын Адъяасүрэн Ганпүрэвийн Отгонсүрэн нар эцгийн голомтоос гал таслан эх орондоо өрх нэмж, ган тулганд галаа бадраалаа.
Аав, ээж, ах дүү, хамаатан садныгаа гэгээн хайрын гэрч болгон хүндэтгэлтэйгээр гэрлэх ёслолоо тэмдэглэсэн хосуудад ГБХЗХГ-ын дарга Б.Алтайбаатар хосуудын гэрэл зураг бүхий "Гэрлэлтийн андгай"-г дурсган аз жаргалын дээдийг хүсэн ерөөсөн юм.
Тус гэрлэх ёслол хүндэтгэлийн арга хэмжээг аймгийн Гэр бүл, хүүхэд, залуучуудын хөгжлийн газар, Залуучуудын хөгжлийн төв, Улсын бүртгэлийн хэлтэс, Ардын дуу бүжгийн Алтай чуулгаас хамтран зохион байгуулав.
